Martisoorkii Maqaadiirta!

-

Kolka ay isu kaa raacaan; Gacalkaada, Gabbaldhaca, Gebi-jamaleed hoostii, iyo Goob-cidleed ay aamusnaantu haraysay, waa nooc kamida; kedisyada wadno qabadka ah. Si kale, waa nooc kamida; xaalmarinta iyo sabeenxirka uu Waayaha sameeyo, midkaa oo maalmahan oo dhan, arrimaha si uun u kala daadinayay.

Sidaa awgeed, galabta waa aynu shuqlannayn. Waxa aan aniga iyo gacalladayda ku mashquulsannayn karinta iyo cunista; Sabeentii ay maqaadiirtu inoo gawracday, si ay noogu xaalmariso. Sabeenta, karinteeda, iyo cunisteeduba, tii la yaqaanay, ee ay dadku isla garanayeen ma ay ahayn. 

Sabeentu, waxay ahayd hanashada iyo isku helista, cajabta iyo shaamareerka sadarka koowaad ku wada xardhan. Karinteeduna, waa isdhigidda dhulka iyo fadhiisiga gebi-jamaleedka hoostii, meel biyaha badda u dhow, iyo iska fogaynta taleefan iyo aalad kasta oo kale. Sidaa ayayna ku bislaatay Sabeentii.

Kolkaa, Sabeentii bislaatay, qaab-cunisteeda, waxa ay ahayd; isu-keliyoobid .. iska soo horjeesasho .. gacmo isudhiibid .. si yaroo macaan, calaacal isu saarid .. waxyar oo is xantaxantayn ah .. indho isku qabasho  .. isa soo wada xaadirin .. dareemidda neecawda macaan, ee jirkeena sida dabacsan ugu dhacaysay .. u dhegraaricinta jabaqda qulqulka hirarka, ee sida degen u rogmanayay .. neefqaadasho .. aamusinta fekradaha aan loo baahnayn .. dajinta qalbi aad u garaacmaya .. macnaynta macnadarrada nolosha .. iyo in aan nafta u sheegaynay, in ay wax walba caadi yihiin, iyada oo aysan jirin, habayaraatee, wax caadi ah!

Afar daqiiqo iyo bar ayay nagu qaadatay cunista Sabeentaasi. Ma garanaysaan da' ahaan inta aynu iminka jirno?! Dhab ahaan, afar daqiiqo iyo bar ayaanu noolnahay!

W/Q: Aw Dacar.



Comments

Post a Comment

Popular posts from this blog

Safar Macnawi ah.

-
Image
Gacallo! Gacalladaydaay! Sideedaba, Basharka waxaa u dabci ah, dabiicina u ah inuu janto oo jeclaado tagtada waayihiisa. Waana sababta uu ula baxay Berisamaad. Waa sababta kololka uu kedis ku xusuusta waayihiisa carruur iyo kacaannimo uu daqiiqado aamusnaan ah isla maqnaado oo ruuxdiisa u dawaafiyo beryo iyo beryo kahor. Kolkaane caalamka maahsanaanta ku dhex dhoollacadeeyo, sidii qof waalan. Gacallo! Gacalladaydaay! Marka laga tago inaad waayahaadii u xiistay, sidoo kale waxaad ku daashay taagantaada. Waxaad ku hafatay badweynta waaqica walaxawday. Waa duni casriya oo qalabkii iyo tegnaloojiyadii ka sharaf iyo qiimo bateen Basharkii daahqaaday. Afgambi aan dhiig ku daadan ayay dunidii ku qabsadeen, oo Basharkii gacan ku dhigeen. Waxa aynu noqonay addoomadii ugu horreeyay ee sayidkooda daahfuray.  Haddii addoomadii hore ay sayidkooda dhabarka ku qaadi jireen, innaga maanta jeebabka ayaynu ku sidanaa. Haddii waagii hore addoomada suuqa laga soo iibsan jiray, markan sayidka ayaa suuqa l
Read more

Dhicid Iyo Labo Dhinac.

-
Image
Waa sidaa! Waa sida aan kuu sheegay ee aan weliba kuugu celceliyay. Marnaba si buuxda kuguma ballanqaadi karo la joogayga, la sheekaysigayga, iyo laabgellintaydaba. Arrintaasi waxa ay gashay oo ay ka tallaabsatay xadka iyo xuduudda hubanti la'aanta.  Dunida dareennada iyo Caalamka dhalanteedka marka aynu joogno waa meesheeda, se, kolka aynu joogno Dunida dhabta ah waa beentay, haddii aan ku iraahdo; "Gebigaygaba adiga ayaa i leh, marwalbane agtaada iyo kashaada ayaan ahay!"  Wixii ay naftaydu jamato oo ay jeclaato ayaanan u ballanqaadi karin helisteeda, sidee ayaan wax kuugu ballanqaadi karaa adiga oo aniga iga baxsan! Laakiin waxyar Gacalladaydaay waxyar! Waxaa jirto wax aan awoodo. Wax aan samayn karo ayaa jirta. Waa in aan kula joogo inta awoodayda. Waa in aan kashaada ahaado inta karaankayga.  Arrintaasi dadku dedaal ayay ku sheegaan. Balse aniga loollan qaddarka, nasiibka iyo waayaha nolosha la la galayo ayaan u arkaa. Lama na hubo cidda guusha raaci doonto. Waa daga
Read more

Kamkamkii Kalluunka!

-
Image
Waa ay is gaabisay, oo qunyar shaf gariiraya dhulka dhigtay. Qabowga iyo qallafsanaanta daran ee dhulka ayay dareentay, se dan kama aysan gelin ee waa ay isku nabtay, illaa ay kamid noqotay dhulkii. Walow ay soo oroday, haddane waxay isku hawshay in hinraageeda iyo hugunka laabteeda ay xakamayso. Sida ilmaha qayliya naaska loogu aamusiiyo, ayay dhug-dhugta wadnaheeda ciidda ku aamusiisay. Dhaqdhaqaaqa xubnaheeda iyo neefsigaba waa ay joojisay. Indho didsan oo baqanaya ayay horteeda ku eegtay. Waa barta ay sanqadha iyo urta ka dareentay. Waxba se waa ay arki waydey. Walow uu mugdi iyo ilays la’aan dhulka ka jiray, haddane taasi kama qarin, kama na hor istaagin. Mugdiga waa ay ba ku shaqaysataa.  Cawska iyo caleemaha ku meegaaran ee ay dhexda kaga jirto ayay u sababaysay wax arag la’aanta. Sidaa awgeed, iyada oo sanqadhtiranaysa oo sidii u dhabbacan ayay sida askari dagaal ku jira u ruqaansatay. Goortii ay gaadhay goobtii ay wax ka arki kartayna, waa ay joogsatay. Hadda, si waafi ah ayay
Read more