Waxaan Ahay Khaa'in!

-

 


Gacalladaydiyeey, waxaan ahay Khaa'in! Arrinkani keli kuma ihi, oo waad igu la jirtaa. Asalkaba dunta aynu ka samaysannahay ayaaba ah; Kheyr iyo Shar. Sidaa awgeed, dhammaanteen waxaa inagu lammaan qayb iyo waax wax khiyaamayn karta. 

Balse, badi dadku waa ay dafiraan oo qariyaan qaybtooda sharka ahi. Aniga se waan kuu sheegayaa oo aan kaaga digayaa. Ma rabo inaan Malag yar oo ceeb-ka-saliima isaga kaa dhigo. Haddaba iska kay ilaali, oo isku kay ilaali.

Yaysan ku maandooriyayn weedhahayga uu malabka ka da'ayo. Waayo, waxba kuma aha, in berri ay sun isu beddelaan. Sidaa oo ay tahayna i aammin. Kasha ha u wada furin, koolkoolintaydan farshaxanka lihi. Maxaa yeelay, waxba kuma aha in berri uu kadeed ka dambeeyo. 

Sidaa oo ay tahayna i aammin. Ha is dhigan oo ha seexan kolkaan Wehelnimo kuu muujinayo. Sababtoo ah, waxba iguma aha inaan berri gudcur kaaga dhex dhaqaaqo. Iyada oo uu xaal sidaa yahay, haddane i aammin.

Sideedaba waa inaad ku socotaa liidka lidadka. Si kale, meel u dhexaysa Haa iyo Maya. Gacalladaydaay, tani waa qaacida-nololeed. Malaayiinsano ayay inaga horraysay, inaga ne dambayn doontaa. Waxa ayna u muuqataa in aynan waxba ka beddeli karin. Ku baraarug oo qorshaha ku darso Khaa'imadaydiyeey.

Comments

Post a Comment

Popular posts from this blog

Safar Macnawi ah.

-
Image
Gacallo! Gacalladaydaay! Sideedaba, Basharka waxaa u dabci ah, dabiicina u ah inuu janto oo jeclaado tagtada waayihiisa. Waana sababta uu ula baxay Berisamaad. Waa sababta kololka uu kedis ku xusuusta waayihiisa carruur iyo kacaannimo uu daqiiqado aamusnaan ah isla maqnaado oo ruuxdiisa u dawaafiyo beryo iyo beryo kahor. Kolkaane caalamka maahsanaanta ku dhex dhoollacadeeyo, sidii qof waalan. Gacallo! Gacalladaydaay! Marka laga tago inaad waayahaadii u xiistay, sidoo kale waxaad ku daashay taagantaada. Waxaad ku hafatay badweynta waaqica walaxawday. Waa duni casriya oo qalabkii iyo tegnaloojiyadii ka sharaf iyo qiimo bateen Basharkii daahqaaday. Afgambi aan dhiig ku daadan ayay dunidii ku qabsadeen, oo Basharkii gacan ku dhigeen. Waxa aynu noqonay addoomadii ugu horreeyay ee sayidkooda daahfuray.  Haddii addoomadii hore ay sayidkooda dhabarka ku qaadi jireen, innaga maanta jeebabka ayaynu ku sidanaa. Haddii waagii hore addoomada suuqa laga soo iibsan jiray, markan sayidka ayaa suuqa l
Read more

Dhicid Iyo Labo Dhinac.

-
Image
Waa sidaa! Waa sida aan kuu sheegay ee aan weliba kuugu celceliyay. Marnaba si buuxda kuguma ballanqaadi karo la joogayga, la sheekaysigayga, iyo laabgellintaydaba. Arrintaasi waxa ay gashay oo ay ka tallaabsatay xadka iyo xuduudda hubanti la'aanta.  Dunida dareennada iyo Caalamka dhalanteedka marka aynu joogno waa meesheeda, se, kolka aynu joogno Dunida dhabta ah waa beentay, haddii aan ku iraahdo; "Gebigaygaba adiga ayaa i leh, marwalbane agtaada iyo kashaada ayaan ahay!"  Wixii ay naftaydu jamato oo ay jeclaato ayaanan u ballanqaadi karin helisteeda, sidee ayaan wax kuugu ballanqaadi karaa adiga oo aniga iga baxsan! Laakiin waxyar Gacalladaydaay waxyar! Waxaa jirto wax aan awoodo. Wax aan samayn karo ayaa jirta. Waa in aan kula joogo inta awoodayda. Waa in aan kashaada ahaado inta karaankayga.  Arrintaasi dadku dedaal ayay ku sheegaan. Balse aniga loollan qaddarka, nasiibka iyo waayaha nolosha la la galayo ayaan u arkaa. Lama na hubo cidda guusha raaci doonto. Waa daga
Read more

Kamkamkii Kalluunka!

-
Image
Waa ay is gaabisay, oo qunyar shaf gariiraya dhulka dhigtay. Qabowga iyo qallafsanaanta daran ee dhulka ayay dareentay, se dan kama aysan gelin ee waa ay isku nabtay, illaa ay kamid noqotay dhulkii. Walow ay soo oroday, haddane waxay isku hawshay in hinraageeda iyo hugunka laabteeda ay xakamayso. Sida ilmaha qayliya naaska loogu aamusiiyo, ayay dhug-dhugta wadnaheeda ciidda ku aamusiisay. Dhaqdhaqaaqa xubnaheeda iyo neefsigaba waa ay joojisay. Indho didsan oo baqanaya ayay horteeda ku eegtay. Waa barta ay sanqadha iyo urta ka dareentay. Waxba se waa ay arki waydey. Walow uu mugdi iyo ilays la’aan dhulka ka jiray, haddane taasi kama qarin, kama na hor istaagin. Mugdiga waa ay ba ku shaqaysataa.  Cawska iyo caleemaha ku meegaaran ee ay dhexda kaga jirto ayay u sababaysay wax arag la’aanta. Sidaa awgeed, iyada oo sanqadhtiranaysa oo sidii u dhabbacan ayay sida askari dagaal ku jira u ruqaansatay. Goortii ay gaadhay goobtii ay wax ka arki kartayna, waa ay joogsatay. Hadda, si waafi ah ayay
Read more